從前我係一個不會感恩, 只覺得別人什麼都好, 自己什麼都缺, 常常覺得自己生活好慘, 唔開心既事多過開心, 頭頭踫著黑, 好運的事一定不會發生在我身上
今篇文章想紀錄一下我的想法, 所以全文字, 有興趣可以繼續收看~
我老爺奶奶本來是在英國做生意, 但好似係 SARS 期間, 好擔心, 想回來照顧個囝 (即我老公), 因為香港得佢一個, 所以就番番黎香港定居
最初結婚要同老爺奶奶住, 十萬個不想, 但老公又想可以照顧佢兩老, 所以就唯有同住, 我記得最初同住有好多問題, 我非常不習慣, 所有野都令我覺得好炆好嬲, 狗吠聲, 雀仔聲都覺得討厭, 攪到我訓唔到, 重要帶耳塞 (太誇張了吧, 哈哈)
有時見到佢地我就已經無名火起, 但都唔知有咩好嬲! 而家回想起, 都唔明點解我當初會咁大反應, 其實佢地真係算好好, 好開通, 好多野都唔介意, 唔會比壓力我地, 又唔會講說話比我地聽, 又做晒D家務, 重日日煮埋飯比我地, 但當時的我, 只感到討厭, 也只看到負面, 不好的事
如果老公不回家晚飯的話, 我一定不會回家食飯, 因為唔想對住佢地, 寧願買外賣番去食, 又或者乾脆食埋先番, 但每日放工, 佢地開門比我既時候必定會問: 食埋飯未? 屋企有飯呀! 如是者, 每天問, 我每次都答食左, 然後我就有這樣兩三年沒有回家晚飯
成日都諗住想搬, 就算要自己做家務都無所謂, 同埋我成日比面色佢地睇, 又會發脾氣, 負能量滿分~ 我認, 我不懂尊重長輩, 也不會忍氣吞聲, 有咩不滿就爆出黎, 而佢地又覺得我無禮貌, 所以老公成日好難做~
直到祖晞出世, 因為接觸更多 (以前基本上只係放工回家講句 HI, 就BYE), 同埋照顧小朋友既分歧, 真係差不多日日吵, 幾日就一大吵~ 從前不太會爭吵的老爺, 也開始發火, 於是就好多時都家無寧日, 嘈完又面左左, 但我又無番工, 全職湊B, 所以每日見面既時間就多左, 成日面左左感覺都唔開心啦, 成日都唔想留屋企~
講番轉頭, 坐月果時, 奶奶日日煮唔同野同湯水比我, 而家諗番都覺得算係咁, 但果時我都係嫌三嫌四, 我諗果時佢都應該唔好受~
祖晞越大, 問題越多, 大多在於佢地太寵佢, 教育方法跟我不一樣, 好多時真係會令我嬲到震, 心跳勁快, 好想噴火好想掉爛晒D野!
老公基本都支持我既教育方法, 所以有時佢會做中間人, 同佢地解釋, 不過有時老爺就會偏激, 成日話, 你以前細個都係咁湊架啦, 點解唔得呀? 講真以前老公細個, 老爺都係番工多, 有幾多時真係照顧小朋友先~ 同埋以前個世界簡單咁多, 而家D 小朋友又早熟, 點可以同以前相比呢~
我地最多爭吵既問題一般都係成日亂比零食祖晞, 買太多玩具, 同埋成日比機仔佢睇~
只係呢幾個問題, 傾過無數次, 平靜地傾試過, 激烈地傾又試過, 最終就變成, 佢地會偷偷地背住我, 做番我唔想佢地對祖晞做既事~ 有時晌樓上, 聽到樓下好似做緊D “違規野" 我就會即刻落去, 佢地見到我落去, 就會好心虛, 即刻收埋 “違禁品" 講明唔好都要做, 真係理解唔到~
大約係上年左右, 果時用左精油一排, 我覺得我個人情緒好左, 正面左, 無咁負面, 睇野都唔同左, 開始感覺到他們好既一面, 例如幫我地照顧祖晞, 等我同老公可以去旅行, 平時我一句交低, 就幫我接送祖晞, 有D咩壞左爛左, 講一聲出個街番黎就會整好, 又或者換左新的~ 做晒所有家頭細務, 等我地可以專心工作, 管教祖晞等
只要回家, 無論幾點, 開聲就會有飯食~ 雖然我還是比較鐘意出街食, 不過有時湊B 湊得攰, 唔洗諗唔洗整就有飯食真係幸福架啦~ 同埋小朋友我都覺得晌屋企食飯係好D~ 所以基本上平日祖晞日日都會晌屋企食飯~
晌果D 爭吵問題上, 而家我轉左方法, 改變唔到佢地, 就改變祖晞啦~ 比佢知道唔可以成日食零食, 放假外唔可以睇機仔, 就算放假睇, 都有限制, 唔係睇成日, 等祖晞學懂自律, 好過我再改變佢地~ 有時聽到祖晞晌樓下話: 我唔睇機仔呀~ 我咳呀, 唔食糖啦~ 聽到我都覺得好安慰~
晌上年九月, 我發生左意外, 佢地每天幫忙照顧祖晞起居飲食, 番學放學, 等我可以休養~ 果時我咬唔到野, 奶奶就煮好多唔同既流質既野, 方便我食, 晌我休養期間, 日日晌房無出街, 為免我突然會情緒低落, 所以我不斷咁 diffuse 高能量 / 令人心情好既精油, 幸好真的沒有什麼負能量出現, 日日就係訓覺食飯同睇劇 (日日睇 Doctor 不知幾開心)
直至傷勢好番好多, 大致生活回復正常後, 我就慢慢學懂感恩, 即使而家佢地都會做D 令我接受唔到既野, 如果唔係D 咩大影晌, 我都會忍住唔出聲唔發脾氣, 然後即刻拎 Acceptance + Forgiveness 出黎聞, 再不斷咁提醒自己, 他們的好處, 然後慢慢就沒有了想發火的感覺~ 然後用平靜既語氣同態度同佢地講番問題, 就會容易D接受~
我而家已經沒有了想搬出去的念頭, 同佢地一齊住, 真係好處比壞相處多, 我也可以有多D 私人時間做我想做既野~ 雖然祖晞成日圍住我, 想我一齊玩~ 但屋企有人可以分散下, 真係好好多~ 小小時間抖下氣都無咁大壓力~ FTM 其實唔易做, 日日1:1, 重要做家務同煮飯, 真係耐力的考驗~ 好佩服沒人幫忙, 獨力照顧屋企媽媽們~ 為你們鼓掌!!!
最近重踏出多一步, 有時放假出去玩, 會主動叫埋佢地一齊參與, 雖然出去都係陪祖晞玩, 但感覺到他們真的好開心~ 當然外出期間都會聽到D唔岩聽既野啦, 我就同自己講, 佢其實係開心既, 只係不懂表達姐, 咪當聽唔到囉~
凡事感恩, 就會睇到事物美好既一面, 心情又會平靜D, 開心D, 重會影晌埋身邊既人, 佢地都會感覺到你美好心態~ 回想起, 其實婆媳問題存在過, 之前都唔開心, 好多時都是我自己想像出來的, 哈哈~
我仍然在學習中, 希望我總有一天, 能看透世事和人與人之間的問題, 不再為世事所影晌! (是練仙的意思嘛??)
Tracy 芳療手作坊 